BAKI,TurkicWorld
Azərbaycan ilə Birləşmiş Krallıq arasında iqtisadi əməkdaşlığın genişləndirilməsi, ticarət və investisiya əlaqələrinin inkişaf etdirilməsi, eləcə də yeni birgə təşəbbüslərin həyata keçirilməsi imkanları müzakirə olunub.
TurkicWorld xəbər verir ki, Azərbaycanın iqtisadiyyat naziri Mikayıl Cabbarov Birləşmiş Krallığın Biznes, İnnovasiya, Elm və Ticarət Nazirliyinin ticarət üzrə dövlət naziri, Lordlar Palatasının üzvü Lord Anas Sarvar ilə görüşüb.
Görüş zamanı Azərbaycan və Birləşmiş Krallıq arasında ikitərəfli iqtisadi əməkdaşlığın hazırkı vəziyyəti və gələcək inkişaf perspektivləri nəzərdən keçirilib. Tərəflər qarşılıqlı ticarətin genişləndirilməsi və investisiya əlaqələrinin gücləndirilməsi imkanları ətrafında fikir mübadiləsi aparıblar.
Müzakirələrdə iki ölkənin biznes dairələri arasında birbaşa tərəfdaşlığın təşviq edilməsi, şirkətlər üçün yeni iqtisadi imkanların araşdırılması və qarşılıqlı sərmayə qoyuluşlarının genişləndirilməsi məsələlərinə də diqqət yetirilib.
Tərəflər rəqəmsal iqtisadiyyat və innovasiya sahələrində əməkdaşlığın inkişaf etdirilməsi imkanlarını nəzərdən keçiriblər. Bu istiqamətlərin Azərbaycan–Birləşmiş Krallıq iqtisadi tərəfdaşlığının şaxələndirilməsi baxımından əhəmiyyəti qeyd olunub.
Görüşdə Azərbaycan ilə Birləşmiş Krallıq arasında iqtisadi əməkdaşlıq üzrə Birgə Hökumətlərarası Komissiyanın fəaliyyəti də müzakirə edilib. Komissiya çərçivəsində iqtisadi və ticarət əlaqələrinin daha da inkişaf etdirilməsi imkanları ətrafında fikir mübadiləsi aparılıb.
Tərəflər qarşılıqlı iqtisadi münasibətlərin şaxələndirilməsi, biznes subyektləri arasında birbaşa əlaqələrin genişləndirilməsi və yeni birgə təşəbbüslərin reallaşdırılması üçün mövcud potensialdan səmərəli istifadənin vacibliyini vurğulayıblar.
