BAKI,TurkicWorld
Transxəzər Beynəlxalq Ticarət Marşrutu bütün Avrasiya üzrə ticarət əlaqələrini əhəmiyyətli dərəcədə dəyişdirmək potensialına malikdir.
Bunu ABŞ-nin Azərbaycandakı müvəqqəti işlər vəkili Emi Karlon cümə axşamı Bakıda keçirilən CAMCA Regional Forumunda deyib.
O, tədbir iştirakçılarını Bakıda salamlayaraq Azərbaycanın göstərdiyi qonaqpərvərliyi xüsusi qeyd edib.
"Mən son 14 aydır ki, Bakı şəhərində yaşamaqdan məmnunam. Əminəm ki, burada olduğunuz müddətdə Azərbaycan xalqının mənə göstərdiyi eyni səmimiyyət və qonaqpərvərliyin şahidi olacaqsınız", - deyə Emi Karlon bildirib.
ABŞ-nin Azərbaycandakı müvəqqəti işlər vəkili çıxışı zamanı Rumsfeld Fondu və CAMCA Regional Forumunun təşkilatçılarına tədbirdə çıxış etmək imkanına görə təşəkkür edib.
O qeyd edib ki, 2008-ci ildən etibarən Rumsfeld Fellowship proqramı Qafqaz, Mərkəzi Asiya, Monqolustan və Əfqanıstandan olan perspektivli gəncləri ABŞ ilə yaxından tanış olmaq üçün bir araya gətirir.
"CAMCA iştirakçıları kimi siz ABŞ-ni özünüz görmək, insanlarla tanış olmaq, Amerika institutlarını ziyarət etmək və onların fəaliyyətini müşahidə etmək, həmçinin Amerika mədəniyyəti ilə yaxından tanış olmaq imkanı əldə etmisiniz. Siz bu tərəfdaşlığın nə təklif etdiyini bilirsiniz, çünki bunu özünüz təcrübədən keçirmisiniz", - deyə o vurğulayıb.
Emi Karlon CAMCA proqramının əsas üstünlüklərindən birinin müxtəlif ölkələrdən və peşə sahələrindən olan gənc mütəxəssisləri bir araya gətirməsi olduğunu bildirib.
Onun sözlərinə görə, CAMCA məzunları akademiya və biznesdən tutmuş kino və incəsənətə qədər müxtəlif sahələri təmsil edir və qlobal məsələlərin həllində fəal iştirak edirlər.
"CAMCA məzunları olaraq siz demək olar ki, bütün qlobal məsələlərlə məşğulsunuz, dəyişikliklərə töhfə verir və müsbət dəyişikliklərə təsir göstərirsiniz", - deyə ABŞ rəsmisi qeyd edib.
O bildirib ki, 2025-ci il ABŞ-Azərbaycan münasibətləri baxımından mühüm il olub.
"2025-ci ilin avqustunda Prezident Donald Tramp Azərbaycan Prezidenti İlham Əliyevi və Ermənistanın Baş naziri Nikol Paşinyanı Ağ Evdə qəbul etdi. Bu görüş onilliklər ərzində davamlı sülh üçün ən yaxşı imkan yaradan razılaşmanın ilkinləşdirilməsi ilə nəticələndi", - deyə Emi Karlon bildirib.
Onun sözlərinə görə, həmin görüş zamanı TRIPP – Beynəlxalq Sülh və Rifah üçün Tramp Marşrutu (Trump Route for International Peace and Prosperity) konsepsiyası da irəli sürülüb.
ABŞ-nin Azərbaycandakı müvəqqəti işlər vəkili qeyd edib ki, 2026-cı ilin fevralında ABŞ vitse-prezidenti Cey Di Vens və Azərbaycan Prezidenti İlham Əliyev Strateji Tərəfdaşlıq haqqında Xartiya imzalayıblar.
O bildirib ki, sənəddə üç əsas istiqamət müəyyənləşdirilib. Bunlara enerji, ticarət və tranzit də daxil olmaqla regional bağlantı, süni intellekt və rəqəmsal infrastrukturu əhatə edən iqtisadi investisiyalar, həmçinin təhlükəsizlik və müdafiə sahəsində əməkdaşlıq daxildir.
"ABŞ CAMCA regionunu böyük iqtisadi və insan potensialına malik məkan kimi görür. Xüsusilə sizin hamınız üçün regional bağlantının genişləndirilməsi prioritetimizdir", - deyə Emi Karlon vurğulayıb.
O bildirib ki, Transxəzər Beynəlxalq Ticarət Marşrutu Mərkəzi Asiyanı, Xəzər dənizini və Cənubi Qafqazı ABŞ və Avropa bazarları ilə əlaqələndirir.
"Bu ticarət marşrutu sadəcə infrastruktur deyil. O, iqtisadiyyatlar, əhali və sizin gələcəyiniz arasında körpüdür. ABŞ bu baxışı real investisiyalarla dəstəkləyib. Buna Transxəzər Müəssisə Fonduna 201 milyon dollar ayrılması da daxildir. Çünki biz hesab edirik ki, əlaqəli region firavan regiondur", - deyə o bildirib.
Emi Karlonun sözlərinə görə, Transxəzər Beynəlxalq Ticarət Marşrutunun tam reallaşdırılması bütün Avrasiya üzrə ticarət əlaqələrini dəyişdirmək potensialına malikdir və marşrutun keçdiyi regionda təmsil olunan hər bir ölkə bundan faydalana bilər.
"Bu, mücərrəd vəd deyil. ABŞ və qlobal investorlar artıq bu marşrutun reallığa çevrilməsinə başlayıblar. Biz nəticələr əldə edəcək, öhdəliklərimizə sadiq qalacaq və ortaq uğura sərmayə qoyacaq tərəfdaşıq", - deyə ABŞ rəsmisi əlavə edib.
O, CAMCA iştirakçılarının ABŞ ilə tərəfdaşlığı öz təcrübələrində gördüklərini qeyd edərək, ölkələr arasında əlaqələrin qurulmasına töhfə verən iştirakçılara təşəkkür edib.
"Sizin bu kimi konfranslarda və digər təcrübələr – biznesdə, siyasətdə və dostluqda yaratdığınız əlaqələr inşa edə biləcəyimiz istənilən ticarət dəhlizi qədər vacibdir. Bu əlaqələr bir çox cəhətdən bütün bu tərəqqinin asılı olduğu təməli təşkil edir", - deyə Emi Karlon bildirib.
O, CAMCA regionunun daha əlaqəli, daha dinc və daha firavan gələcəyə sahib olması üçün ABŞ-nin əməkdaşlığı davam etdirəcəyini vurğulayıb.
"ABŞ daha əlaqəli, daha dinc və daha firavan CAMCA regionunun yaradılmasına sadiqdir. Bu yolu hamınızla birlikdə qurmaqdan qürur duyuruq", - deyə ABŞ-nin Azərbaycandakı müvəqqəti işlər vəkili əlavə edib.
