Баку. TurkicWorld:
2025-жылдын 10-июлунда Венгрия Өкмөтүнүн түрк маданий кызматташтыгы жана Венгрия–Түрк илим жана инновациялар жылы боюнча атайын өкүлү Петер Хоппал мырза жана Венгриянын Азербайжан Республикасындагы Атайын жана Ыйгарым укуктуу элчиси Тамаш Торма мырза Түрк маданияты жана мурасы фондуна расмий сапар менен келишти.
Фонддун президенти Актоты Раимкулова айым менен болгон жолугушууда уюм менен Венгриянын ортосундагы кызматташтыктын учурдагы абалы, биргелешкен демилгелердин ишке ашуусу жана мындан аркы өнүгүү перспективалары тууралуу кеңири пикир алмашуу болду. Өзгөчө, Фонддун ишмердүүлүгүндөгү Венгриянын байкоочу мамлекет катары кошкон салымы белгиленип өттү.
Жолугушуу учурунда түрк жана венгер элдеринин ортосундагы тарыхый байланыштар менен маданий дипломатияны чыңдоонун маанилүүлүгү баса белгиленди. Эксперттерди алмашуу, академиялык кызматташтык жана биргелешкен басма долбоорлор сыяктуу демилгелерди өнүктүрүү жолдору талкууланды.
Фонддун президенти Актоты Раимкулова айым Венгриянын уюмдун ишине туруктуу кызыгуусун жана маданий долбоорлорго активдүү катышуусун жогору баалады. Ал Венгрия менен болгон кызматташтык түрк жана европа элдеринин ортосунда өз ара түшүнүшүүнү жана маданий жакындашууну шарттаган маданий көпүрө болуп саналарын белгиледи.
Өкмөттүн атайын өкүлү Петер Хоппал мырза Венгриянын Түрк дүйнөсү менен кызматташууга жана Фонддун кеңири ишмердүүлүгүнө катышууга даяр экендигин билдирди. Ал келечектеги кызматташуунун мүмкүнчүлүктөрү боюнча сунуштарын бөлүштү.
Ишке ашып жаткан ийгиликтүү долбоорлордун арасында түрк элдеринин фольклоруна арналган көп томдук басылманын даярдалышы өзгөчө белгиленди. Бул долбоордун негизги максаты — түрк элдеринин жомок, уламыш, макал-лакап, баят, эпос жана башка фольклордук жанрлар аркылуу мурасталган бай материалдык эмес мурасын системалаштырып, кийинки муундарга өткөрүп берүү. Венгриянын катышуусу жана көрсөткөн колдоосу өзгөчө белгиленип, жогору бааланды.
