Bakı, TurkicWorld, Orxan Qədirzadə
Səudiyyə Ərəbistanının Bələdiyyə və Mənzil Təsərrüfatı Nazirliyi mübarək Ramazan ayı öncəsi Mədinə şəhərində genişmiqyaslı monitorinqlərə başlayıb.
AzerVoice xəbər verir ki, hazırlıq tədbirləri çərçivəsində sağlamlıq və qida təhlükəsizliyi ilə bağlı 13 mindən çox, kommersiya fəaliyyəti üzrə isə təxminən 4 min yoxlama turu həyata keçirilib.
Mədinə Regional Bələdiyyəsi tərəfindən təqdim olunan plana əsasən, qida məhsullarının və suyun təsdiq olunmuş sağlamlıq standartlarına uyğunluğunu yoxlamaq məqsədilə 8 min nümunə toplanaraq laboratoriyalara cəlb edilib. Nazirlik bildirib ki, Ramazan ayı boyunca sakinlərin və ziyarətçilərin təhlükəsizliyini təmin etmək üçün 5 700-dən çox mütəxəssis və 1 230-dan çox xüsusi texnika səfərbər olunub.
Əməliyyat planına həmçinin fövqəladə hallar üçün hazırlanmış 12 alternativ fəaliyyət planı da daxildir. Bu addımlar pik vaxtlarda və insan sıxlığının artdığı dönəmlərdə bələdiyyə xidmətlərinin fasiləsizliyini təmin etməyə xidmət edir. Mədinə Bələdiyyəsi tərəfindən icra olunan bu kompleks tədbirlər şəhərdə sağlam mühit yaratmaq və xidmət keyfiyyətini ən yüksək səviyyədə saxlamaq məqsədi daşıyır.
