BAKI, TurkicWorld, Orxan Qədirzadə
Assam ştatında hakim Hindistan Xalq Partiyası tərəfindən paylaşılan süni intellektlə hazırlanmış video Hindistanda geniş ictimai qınağa səbəb olub.
TurkicWorld xəbər verir ki, video müsəlmanlara qarşı zorakılığı təbliğ etdiyi iddiaları fonunda qısa müddətdə sosial şəbəkələrdən silinib.
17 saniyəlik süni intellekt əsaslı video Assam ştatının baş naziri Himanta Bisva Sarmanın müsəlmanlara atəş açırmış kimi göstərilməsi ilə diqqət çəkib. “Point blank shot” başlığı ilə X sosial şəbəkəsində yayılan görüntülər şənbə günü sürətlə yayılıb, lakin müxalifət nümayəndələrinin və ictimaiyyətin sərt reaksiyasından sonra silinib.
Video real kadrlarla süni intellektlə yaradılmış təsvirlərin birləşməsindən ibarət olub. Görüntülərdə baş nazirin tüfənglə iki müsəlman kişiyə atəş açdığı səhnələr “No Mercy” (Mərhəmət yoxdur) başlığı altında təqdim edilib. Kadrlarda həmçinin Sarma kovboy geyimində tapança ilə təsvir olunub, fon üzərində isə “Xaricilərdən azad Assam” kimi şüarlar yer alıb.
Assam əhalisinin təxminən üçdə birini təşkil edən, sayı 12 milyondan çox olan müsəlmanlara qarşı bu cür məzmunun yayılması xüsusilə mart–aprel aylarında keçirilməsi gözlənilən ştat seçkiləri ərəfəsində siyasi gərginliyi artırıb. Sarma əvvəllər də müsəlmanlara, xüsusilə benqal mənşəli müsəlmanlara qarşı sərt və ksenofob ritorikası ilə tənqid olunub.
Assamda hakim partiyanın yerli strukturları videoya görə rəsmi açıqlama verməyib. Partiyanın yerli rəhbərlərindən Rancib Kumar Sarma bildirib ki, video silinib və mövzu ilə bağlı şərh verilməyəcək.
Baş nazir son aylarda müsəlmanlara qarşı ritorikasını daha da sərtləşdirib. O, müsəlmanları cinayətkarlıq və demoqrafik dəyişikliklərlə əlaqələndirib, ötən ay isə benqal dilli müsəlmanlar üçün təhqiramiz ifadə sayılan “Miya müsəlmanları”na “çətinlik yaratmağa” çağırıb.
Assam müsəlman əhalisinin payına görə yalnız Hindistanın şimalındakı Kəşmir və Ərəb dənizində yerləşən Lakşadvip adalarından geri qalır.
Müxalif Hindistan Milli Konqresi Partiyasının Assam üzrə liderlərindən Aman Vadud videonu “son dərəcə narahatedici” adlandırıb. Onun sözlərinə görə, bu hadisə hakim partiyanın qanuna və elementar etikaya hörmətsiz yanaşmasını nümayiş etdirir və nifrət siyasətinin açıq nümunəsidir.
Konqres Partiyası yaydığı bəyanatda videonu “kütləvi zorakılıq və soyqırıma çağırış” kimi qiymətləndirib. Bütün Hindistan Trinamool Konqresi Partiyasının lideri Mahua Moitra isə ölkənin ali məhkəmələrini məsələyə reaksiya verməyə çağırıb.
Bu, Assamda süni intellekt vasitəsilə yayılan ilk qalmaqallı video deyil. Keçən ilin sentyabrında da “BJP-siz Assam” adlı oxşar video paylaşılmış, ştatın müsəlmanlar tərəfindən “ələ keçirildiyi” iddia olunmuşdu.
Ümumilikdə, Assamda və ölkə üzrə müsəlmanlara qarşı artan nifrət kampaniyası Hindistanda hakim ideologiyanın tərkib hissəsi kimi qiymətləndirilir. Hüquq müdafiəçiləri son illərdə nifrət nitqinin və zorakılığın kəskin artdığını bildirir. Hindistan Nifrət Laboratoriyasının araşdırmasına görə, 2025-ci ildə ölkədə 1 318 nifrət nitqi hadisəsi qeydə alınıb və onların böyük əksəriyyəti müsəlmanları hədəf alıb.
