BAKI, TurkicWorld, Orxan Qədirzadə
ABŞ-ın nüfuzlu nəşrlərindən biri olan The Washington Post qəzetinin baş direktoru Uill Lyuis istefa verdiyini açıqlayıb. Qərar redaksiyada işçilərin təxminən üçdə birinin ixtisarı ilə bağlı məlumatın yayılmasından cəmi bir neçə gün sonra verilib.
TurkicWorld xəbər verir ki, bu barədə Avropa mediası məlumat yayıb.
Uill Lyuis istefa qərarını kollektivə ünvanladığı məktubda açıqlayaraq bildirib ki, iki il davam edən struktur dəyişikliklərindən sonra “kənara çəkilməyin doğru zamanı çatıb”. Onun səlahiyyətlərini müvəqqəti olaraq qəzetin maliyyə direktoru Ceff D’Onofrio icra edəcək və o, vəzifəsinin icrasına dərhal başlayır.
Qeyd edək ki, ötən çərşənbə günü elan edilən ixtisarlar yüzlərlə jurnalisti əhatə edib. ABŞ mediasının məlumatına görə, ixtisar edilənlərin sayı təxminən 800 nəfərlik redaksiya heyətinin 300-ə yaxın əməkdaşını təşkil edir. Maraqlıdır ki, nə Lyuis, nə də qəzetin sahibi Cef Bezos işçilərə ixtisarların elan edildiyi iclasda iştirak edib.
İxtisarların miqyası ilkin gözləntiləri üstələyib. Belə ki, qəzetin idman bölməsi tam bağlanıb, fotoqraflar ştatı ləğv edilib, Vaşinqtonda və xarici ölkələrdə hadisələri işıqlandıran əməkdaşların sayı kəskin şəkildə azaldılıb.
Son illər The Washington Post ciddi kadr axını və on minlərlə abunəçinin itkisi ilə üzləşib. Bu proses qəzet sahibinin 2024-cü il prezident seçkisi kampaniyası zamanı Kamala Harrisin dəstəyindən imtina etməsi və rəy bölməsinin daha mühafizəkar istiqamətə yönəldilməsi qərarından sonra daha da sürətlənib.
Qəzetin keçmiş baş redaktoru Martin Baron sahibini ABŞ prezidenti Donald Trampa yaxınlaşmaq cəhdində ittiham edərək, baş verənləri “brendin demək olar ki, ani özünü məhv etməsi nümunəsi” adlandırıb.
Xatırladaq ki, Uill Lyuis bundan əvvəl The Wall Street Journal nəşrində rəhbər vəzifələrdə çalışıb və 2024-cü ilin yanvarında The Washington Postun baş direktoru təyin edilib. Onun fəaliyyəti dövründə redaksiyada ciddi daxili münaqişələr yaşanıb və uğursuz islahatlar nəticəsində baş redaktor Salli Bazbinin istefası ilə yekunlaşıb.
Son ixtisarlar fonunda qəzetin sahibi Cef Bezos bildirib ki, o, ya nəşrə investisiyaları artıracaq, ya da The Washington Postu yeni sahibə satacaq. Lyuis isə vida məktubunda Bezosu tərifləyərək, “Bu nəşrin daha yaxşı sahibi ola bilməzdi” ifadəsini işlədib.
Lyuis qeyd edib ki, rəhbərliyi dövründə qəbul edilən çətin qərarlar qəzetin uzunmüddətli dayanıqlığını təmin etmək məqsədi daşıyıb və nəşrin gələcək illərdə də milyonlarla oxucu üçün keyfiyyətli, qərəzsiz xəbərlər dərc etməsinə xidmət edib.
