BAKI,TurkicWorld, Orxan Qədirzadə
İranın Fars körfəzində iki xarici neft tankerini ələ keçirdiyi bildirilir.
TurkicWorld xəbər verir ki, İran İslam İnqilabı Keşikçiləri Korpusunun Hərbi-Dəniz Qüvvələrinin regional komandanı general Heydər Honarian Mücərrədin sözlərinə görə, tankerlerde ümumilikdə təxminən 1 milyon litr dizel yanacağı olub. Gəmilər Farsi adası yaxınlığında saxlanılaraq Buşehr limanına aparılıb.
Məlumata əsasən, hər iki tankerdə olan 15 ekipaj üzvü hazırda məhkəmə orqanlarının nəzarətindədir. Saxlanılan şəxslərin və gəmilərin hansı ölkəyə məxsus olduğu, eləcə də hansı bayraq altında üzmələri barədə rəsmi açıqlama verilməyib.
İran hakimiyyəti regionda oxşar ittihamlarla vaxtaşırı neft daşıyan gəmiləri saxlayır. Belə ki, ötən ilin dekabrında Hörmüz boğazından keçən xarici tanker saxlanılmış, 16 ekipaj üzvü müvəqqəti olaraq nəzarətə götürülmüşdü. Noyabr ayında da eyni boğazda analoji hadisə qeydə alınmışdı.
Qərb ölkələri isə İranı 2019-cu ildə bir sıra tankerlərə qarşı həyata keçirilmiş mina hücumlarında, həmçinin 2021-ci ildə İsraillə əlaqəli neft tankerinə dron hücumu təşkil etməkdə ittiham edib. Həmin hücum nəticəsində iki avropalı ekipaj üzvü həlak olmuşdu. Sözügedən gərginliklər ABŞ prezidenti Donald Trampın ilk prezidentlik dövründə İranla 2015-ci il nüvə sazişindən birtərəfli qaydada çıxmasından sonra artmışdı.
