BAKI, TurkicWorld, Orxan Qədirzadə
İsrailin Baş naziri Benyamin Netanyahu İsraillə Suriya arasında mümkün razılaşmanın əldə edilə biləcəyini və Dəməşqdən başlayaraq Hərmon dağının ətəklərinədək uzanan demilitarizasiya olunmuş təhlükəsizlik zolağının yaradılmasını gözlədiyini bildirib.
TurkicWorld xəbər verir ki, Netanyahu bu barədə ABŞ Prezidenti Donald Trampın İsraillə Suriya arasında “güclü və səmimi dialoqun” vacibliyini vurğulamasından bir gün sonra, Suriyada yaralanan İsrail əsgərləri ilə görüşü zamanı bildirib.
Tramp administrasiyası iki ölkə arasında qarşılıqlı hücuma yol verməmək haqqında saziş imzalanması üçün çalışır.
Suriya rəsmi olaraq İsraili tanımır və 2024-cü ilin dekabrından etibarən İsrail tərəfindən daha geniş ərazilər işğal edilib. İsrail 1967-ci il müharibəsində Suriyanın Qolan təpələrini ələ keçirmiş və daha sonra bu ərazini ilhaq etmişdi. Bu addım ABŞ tərəfindən tanınsa da, digər ölkələrin əksəriyyəti tərəfindən tanınmayıb.
“Bizim Suriyadan gözləntimiz odur ki, Dəməşqdən Hermon dağının ətəklərinədək demilitarizə olunmuş təhlükəsizlik zolağı yaradılsın. Bu əraziləri İsrail vətəndaşlarının təhlükəsizliyini təmin etmək üçün nəzarətdə saxlayırıq və bu, bizim öhdəliyimizdir.” - nazir deyib.
Vaşinqton Suriyanın yeni rəhbəri Əhməd Əl-Şəranı dəstəkləsə də, İsrail onun keçmişdə bəzi islamçı qruplarla əlaqələrinə görə ehtiyatla yanaşır. Bununla belə, tərəflər mümkün saziş istiqamətində danışıqları davam etdirir.
Ötən cümə günü İsrail ordusunun Suriyanın cənubunda keçirdiyi hava əməliyyatı nəticəsində 13 nəfər həlak olmuşdu. İsrail ordusu həmin bölgədə Livan mənşəli islamçı silahlı qruplaşmanı hədəf aldığını açıqlamışdı.
