Bakı, TurkicWorld
Gürcüstanın keçmiş prezidenti Salome Zurabişvili Tbilisidə jurnalistlərə yeni ofisini təqdim edib və orada "prezident funksiyasını" davam etdirəcəyini bəyan edib.
TurkicWorld xəbər verir ki, bu barədə Gürcüstan mətbuatı məlumat yayıb.
"Mən bu gün sizi burada, bu yeni ofisdə qəbul etmək istəyirəm. Bu ofis Orbeliani sarayının davamıdır (qeyd – prezident iqamətgahı). Ola bilsin, o Orbeliani sarayına bənzəmir, amma burada onun ruhu və canı yer alır və prezidentin funksiyaları məhz burada davam edəcək",- Zurabişvili bildirib.
Onun sözlərinə görə, ölkə hal-hazırda dərin böhrana uğrayıb və çıxış yolu təkrar (növbədənkənar) parlament seçkilərinin təyin olunmasıdır.
Zurabişvili Gürcüstan əhalisi ilə görüşlər keçirəcəyini, xüsusilə 10 yanvar tarixində ölkənin qərbində yerləşən Zuqdidi şəhərinə səfər edəcəyini söyləyib.
"Mən prezidentəm və prezident olaraq da qalacağam",- deyə o brifinqdə bildirib.
