BAKI, TurkicWorld, Orxan Qədirzadə
Türk Hava Yolları (THY) sosial şəbəkələrdə İran istiqamətində həyata keçirilən reyslərin dayandırılması ilə bağlı yayılan məlumatların həqiqəti əks etdirmədiyini bəyan edib.
TurkicWorld xəbər verir ki, THY-nin Kommunikasiya idarəsinin rəhbəri Yahya Üstün sosial media hesabında etdiyi açıqlamada, İran uçuşlarının planlaşdırılan qrafik üzrə davam etdiyini bildirib. O, ictimaiyyətdə yaranan yanlış məlumatların qarşısını almaq məqsədilə qeyd edib ki, hazırda uçuş əməliyyatlarında hər hansı bir ləğvolunma halı mövcud deyil.
Yahya Üstün xüsusilə vurğulayıb ki, gündüz saatlarında icra edilən bütün səfərlər əvvəlcədən müəyyən edilmiş qaydada və kəsintisiz şəkildə həyata keçirilir. O, sərnişinləri və ictimaiyyəti rəsmi mənbələr tərəfindən təsdiqlənməyən, qeyri-dəqiq xəbərlərə etibar etməməyə çağırıb.
Hazırda hava yolu şirkətinin operativ iş rejimində heç bir dəyişikliyin olmadığı və uçuş trafikinin normal axarında davam etdiyi bildirilir.
Regionda artan gərginlik fonunda bu növ dezinformasiyaların yayılması sərnişinlər arasında təşviş yaratmağa hesablanıb. THY-nin sürətli reaksiyası həm iqtisadi itkilərin qarşısını almaq, həm də hava nəqliyyatı sferasında etibarlılığı qorumaq məqsədi daşıyır.
