BAKI, TurkicWorld, Orxan Qədirzadə
Türkiyə Qızıl Aypara Cəmiyyəti İraqın Kərkük şəhərində baş verən daşqınlardan zərər çəkmiş ailələrə ərzaq yardımı çatdırıb.
TurkicWorld xəbər verir ki, humanitar yardım çərçivəsində Kərkük şəhəri və ətraf yaşayış məntəqələrində yaşayan sakinlərə ümumilikdə 500 ədəd ərzaq qutusu paylanılıb. Yardımlar daşqından ən çox zərər görmüş Kərkükə bitişik Yəhyava bölgəsində, eləcə də Yarımdca, Zindana, Kübətli və Bəşir kəndlərində həyata keçirilib.
Türkiyə Qızıl Aypara Cəmiyyətinin İraqdakı nümayəndə heyətinin rəhbəri Çətin Bayatlı qeyd edib ki, daşqın nəticəsində ciddi maddi ziyanla üzləşmiş bölgələrdə yaşayan əhali üçün təcili humanitar dəstək göstərilib. Onun sözlərinə görə, hər bir ərzaq qutusu bir ailənin təxminən bir həftəlik qida ehtiyacını qarşılamaq üçün nəzərdə tutulub. Qutuların tərkibinə düyü, bitki yağı, makaron və bulqur daxildir.
İraq Qızıl Aypara Cəmiyyətinin Kərkük üzrə yerli şöbəsinin direktoru Hüseyn Əli Şevkət göstərilən yardımı bölgə üçün mühüm dəstək kimi qiymətləndirib. O vurğulayıb ki, xüsusilə Yəhyava bölgəsi və ona bitişik kəndlər daşqından sonra əsas ehtiyaclarını qarşılamaq baxımından çətin vəziyyətdədir.
Şevkətin sözlərinə görə, təbii fəlakətdən zərər çəkmiş kənd sakinləri genişmiqyaslı yardıma ehtiyac duyur və paylanan ərzaq yardımı onların təcili ehtiyaclarının əhəmiyyətli hissəsini qarşılayır.
Yarımdca kəndinin sakini Xaçəm İsmayıl da göstərilən humanitar dəstəyə görə minnətdarlığını ifadə edib. Onun sözlərinə görə, hazırda çətin şəraitdə yaşayan ailələr üçün bu yardım mühüm əhəmiyyət daşıyır və gündəlik ehtiyacların böyük hissəsini təmin edir.
