BAKI, TurkicWorld, Orxan Qədirzadə
Türkiyə İsrailin işğal altındakı Şərqi Qüdsdə yerləşən BMT-nin UNRWA binasına basqın edərək onu müsadirə etməsini kəskin şəkildə pisləyib. Ankara bu addımı “beynəlxalq hüququn açıq şəkildə pozulması” kimi xarakterizə edib.
TurkicWorld xəbər verir ki, Türkiyənin Xarici İşlər Nazirliyi açıqlamasında bildirib ki, İsrailin diplomatik toxunulmazlığı olan bir BMT binasına müdaxilə edərək onu müsadirə etməsi yolverilməzdir və beynəlxalq hüquq çərçivəsində məsuliyyət yaradır. Nazirlik əlavə edib ki, Beynəlxalq Ədalət Məhkəməsinin 22 oktyabr 2025-ci il tarixli rəyinə əsasən, İsrail işğalçı tərəf olaraq UNRWA-nın fəaliyyətinə mane olmamaq, əksinə, onun işini asanlaşdırmaq öhdəliyinə malikdir.
Ankara vurğulayıb ki, UNRWA-nın fəaliyyəti fələstinli qaçqınlara dəstək verən, onların geri dönüş hüququnu qoruyan mexanizmdir. Nazirlik beynəlxalq ictimaiyyəti İsrailin beynəlxalq hüquqa zidd addımlarına qarşı İsrailə təzyiq göstərməyə və UNRWA-ya dəstəyi gücləndirməyə çağırıb.
