BAKI,TurkicWorld,Yusif Şərifzadə
Çinin süni intellekt sahəsində fəaliyyət göstərən DeepSeek şirkətinin ikinci maliyyələşdirmə raundunu müvəqqəti dayandırdığı bildirilir. Məlumata görə, şirkət potensial investorlara hazırda investisiya müqavilələrinin imzalanmayacağını açıqlayıb.
TurkicWorld xəbər verir ki, Bloomberg News məsələ ilə tanış mənbələrə istinadən yazıb ki, DeepSeek ikinci investisiya raundunda iştirak etməsi gözlənilən bəzi investorlara yaxın günlərdə maliyyələşdirmə müqavilələrinin bağlanmayacağını şifahi şəkildə bildirib.
Məlumata əsasən, şirkət investisiya prosesini gələcəkdə yenidən bərpa edə bilər. Lakin bunun nə vaxt baş verəcəyi ilə bağlı konkret tarix açıqlanmayıb.
Reuters agentliyi xəbəri müstəqil şəkildə təsdiqləyə bilmədiyini bildirib. Agentlik həmçinin iş saatlarından kənarda DeepSeek şirkətindən məsələ ilə bağlı şərh ala bilməyib.
Xəbərdə qeyd olunur ki, Hançjou şəhərində yerləşən DeepSeek əvvəlki uğurlu maliyyələşdirmə mərhələsindən sonra təxminən 500 milyard yuan dəyərində qiymətləndirmə ilə yeni investisiya raunduna başlamağı planlaşdırırdı. Şirkət ilk maliyyələşdirmə raundunda təxminən 7,4 milyard ABŞ dolları vəsait cəlb etmişdi.
Prosesin dayandırılmasının səbəblərindən biri də şirkətin təsisçisi Lyan Venfenin əvvəlki investisiya raundu zamanı investorlarla keçirdiyi görüşlərdə səsləndirdiyi fikirlərlə bağlı internetdə yayılan məlumatlardan narazı qalması olub.
