BAKI, TurkicWorld, Orxan Qədirzadə
Quba rayonunda intellektual nailiyyətləri ilə respublika səviyyəsində fərqlənən Xəmsə İntellektual Oyunlarının Respublika birincisi olan YURD komandası ilə rəsmi görüş təşkil olunub.
TurkicWorld xəbər verir ki, görüş İnnovativ İnkişafa Dəstək İctimai Birliyi, “Vətən Naminə” Şəhid Ailələrinə Dəstək İctimai Birliyi, Xınalıq Turizmin İnkişafına Dəstək İctimai Birliyi, QHT-nın Regional Resurs Mərkəzi İctimai Birliyi və “YURD” Gənclərin İntellektual İnkişafına Dəstək İctimai Birliyinin birgə təşəbbüsü ilə keçirilib.
Görüş zamanı komanda üzvlərinin intellektual yarışlara hazırlıq prosesi, əldə olunan nəticələr və qələbəyə aparan mərhələlər ətrafında müzakirələr aparılıb. Tədbirdə çıxış edən QHT nümayəndələri YURD komandasının əldə etdiyi uğurların təhsil və intellektual inkişaf sahəsində mühüm nümunə olduğunu qeyd ediblər.
Tədbirin sonunda YURD komandasının bütün üzvlərinə Quba rayonunda fəaliyyət göstərən QHT sədrləri tərəfindən imzalanmış və möhürlənmiş sertifikatlar təqdim olunub. Komandanın əsas təşkilatçısı və kapitanı Ramin Mahmudov isə göstərdiyi təşkilati fəaliyyət və əldə olunan nəticələrə görə xüsusi plaketlə təltif edilib.
Qeyd olunub ki, YURD komandası bilik, kollektiv məsuliyyət və sistemli yanaşma əsasında əldə edilən uğurun mümkünlüyünü nümayiş etdirərək, region gəncləri üçün nümunəvi model formalaşdırıb.
