BAKI, TurkicWorld
Müharibə, plastik və işıq çirklənməsi səbəbindən arılar yox olmaq təhlükəsi ilə üz-üzədir.
TurkicWorld xəbər verir ki, Reading Universitetinin rəhbərliyi ilə aparılan yeni araşdırmada tozlandırıcıların — xüsusilə arıların — sürətlə artan yeni təhlükələrlə qarşı-qarşıya qaldığı bildirilib.
Hesabatda qeyd edilir ki, müharibələr, mikroplastiklər, süni işıqlar, antibiotik qalıqları və pestisid kokteylləri növbəti onillikdə arı populyasiyalarında kəskin azalmaya səbəb ola bilər.
Alimlər Ukraynadakı müharibə nümunəsində göstəriblər ki, silahlı münaqişələr ölkələri daha azsaylı kənd təsərrüfatı məhsulu yetişdirməyə məcbur edir. Nəticədə isə arıların fərqli qida mənbələrinə çıxışı məhdudlaşır, bu da onların sağ qalmasına ciddi təsir göstərir.
Eyni zamanda, Avropada aparılan araşdırmalarda 315 arı koloniyasının əksəriyyətində PET kimi mikroplastik izlərinə rast gəlinib. Gecə saatlarında küçə işıqlarının işıq çirklənməsi isə tozlandırıcıların çiçək ziyarətlərini 62 faiz azaldır.
Arılar həmçinin antibiotik qalıqları və müxtəlif kimyəvi maddələrin qarışığından ibarət pestisid kokteylləri səbəbilə davranış dəyişiklikləri və həyat dövrünün pozulması ilə üzləşirlər.
"Əgər vaxtında hərəkətə keçsək, bu zərərləri azaltmaq mümkündür. Tozlandırıcıları qorumaq həm təbiət, həm də qida təhlükəsizliyi üçün həyati əhəmiyyət daşıyır," – deyə professor Saymon Potts bildirib.
Hesabatda həmçinin arıları qorumaq üçün bir sıra tövsiyələr də yer alıb. Bunlara antibiotik çirklənməsinə qarşı daha sərt qanunvericilik, havanın çirklənməsinin azaldılması üçün elektrikli nəqliyyat vasitələrinin genişləndirilməsi və daha çox polen istehsal edən bitkilərin əkilməsi daxildir.
“Hətta həyətimizdəki kiçik dəyişikliklər belə böyük nəticələrə səbəb ola bilər. Lakin bu istiqamətdə həm fərdi, həm də siyasi səviyyədə kollektiv fəaliyyət vacibdir.” - deyə Dr. Dipa Senapati isə qeyd edib.
