Bakı, TurkicWorld
Keçən il Qərbi Afrikada həddindən artıq istilər qlobal kakao istehsalına ciddi təsir göstərib, məhsuldarlığın azalması kakao qiymətlərini rekord səviyyələrə çatdırıb.
TurkicWorld AzerVoice -ə istinadən xəbər verir ki, dünya kakao istehsalının 70%-ni təmin edən Fil Dişi Sahili, Qana, Kamerun və Nigeriyada fermerlər ekstremal hava şəraiti, xəstəliklər və qeyri-sabit yağışlarla mübarizə aparırlar.
Climate Central-ın araşdırmasına görə, neft, kömür və metan qazının yanması səbəbindən bu bölgələrdə temperatur artır və kakao üçün ideal hesab edilən 32°C həddi daha tez-tez aşılır.
2023-cü ildə qlobal temperatur rekord həddə çatdıqda, bu bölgələrin üçdə ikisində ən azı 42 gün ərzində temperatur 32°C-ni keçib. Alimlər bildirirlər ki, bu, məhsuldarlıq və keyfiyyəti azaldır. Bundan əlavə, qaçaqmalçılıq və qeyri-qanuni mədənçilik də istehsala mənfi təsir göstərir.
İstehsalın azalması kakao qiymətlərinin sürətlə artmasına səbəb olub. 2023-cü ilin sonundan etibarən Nyu-York birjasında ton başına kakao 10.000 dolları keçib, dekabrda isə 12.500 dollara çataraq rekord qırıb. İsveçrənin Lindt & Sprüngli şirkəti 2024-cü ildə şokoladın qiymətini artıracağını açıqlayıb.
Missisipi Dövlət Universitetinin professoru Narcisa Prikop qeyd edir ki, quraqlıq kakao istehsalı üçün təhlükə yaradır. BMT-nin Səhralaşmaya Qarşı Mübarizə Konvensiyasına əsasən, son 30 ildə Yer kürəsinin dörddə üçü daha quraq hala gəlib.
"Quraqlıqla mübarizə təkcə şokoladı deyil, həm də planetin ekoloji tarazlığını qorumaq üçün vacibdir", – deyə Prikop bildirib.
