BAKI,TurkicWorld
Tacikistan nəqliyyat və ticarət əlaqələrini genişləndirməklə yeni bazarlara çıxış imkanlarını artırmaq niyyətindədir.
Bunu Tacikistanın iqtisadi inkişaf və ticarət naziri Abdurahmon Abdurahmonzadə Bakıda keçirilən II Azərbaycan Beynəlxalq İnvestisiya Forumunda (AIIF 2026) “Qlobal artımın, investisiyanın və əlaqələrin gələcəyinin formalaşdırılması” mövzusunda panel müzakirəsində bildirib.
Dənizə çıxışı olmayan Tacikistan üçün regional nəqliyyat dəhlizlərinin inkişafı və ticarət prosedurlarının sadələşdirilməsi əsas prioritetlər sırasındadır. Nazir qeyd edib ki, ölkə Mərkəzi Asiya, Çin, Cənubi Asiya, MDB və digər regionların bazarları ilə əlaqələri gücləndirməkdə maraqlıdır.
“Yalnız bir tərəfdaşa arxalanmaq olmaz”
Abdurahmonzadə qlobal qeyri-müəyyənlik şəraitində iqtisadi dayanıqlılığın yalnız bir istiqamətə və ya bir tərəfdaşa əsaslanmaqla təmin edilə bilməyəcəyini vurğulayıb.
“Tacikistan üçün beynəlxalq əməkdaşlıq yalnız mövcud çağırışların aradan qaldırılması vasitəsi deyil, həm də iqtisadi inkişafın uzunmüddətli təməlidir. Biz yeni tərəfdaşlıqlara və birgə investisiya layihələrinə açığıq”, – deyə nazir bildirib.
Onun sözlərinə görə, Tacikistan ticarət, nəqliyyat, enerji, rəqəmsal iqtisadiyyat və sənaye sahələrində beynəlxalq əməkdaşlığı genişləndirmək istəyir.
Nazir qeyd edib ki, ölkənin məqsədi qlobal iqtisadiyyatda baş verən dəyişikliklərə sadəcə uyğunlaşmaq deyil. Tacikistan bu dəyişikliklərdən iqtisadi transformasiyanı sürətləndirmək, rəqabət qabiliyyətini artırmaq və dayanıqlı iqtisadi artım üçün istifadə etməyə çalışır.
“Biz yeni imkanlar yaratmaq və iqtisadi inkişafın daha geniş imkanlara çevrilməsini təmin etmək istəyirik”, – Abdurahmon Abdurahmonzadə vurğulayıb.
