BAKI,TurkicWorld
Şimali Makedoniya iqtisadiyyatı 2026-cı ilin ilk yarısında 3,7% böyüyüb, əsas kapitala qoyulan investisiyalar isə 9,3% artıb.
Bunu ölkənin iqtisadiyyat və əmək naziri Besar Durmişi Bakıda keçirilən II Azərbaycan Beynəlxalq İnvestisiya Forumunda (AIIF 2026) açıqlayıb.
Nazirin sözlərinə görə, iqtisadi artımın tempi ikinci rübdə daha da yüksələrək 4,3%-ə çatıb. İnvestisiyalar isə ölkənin iqtisadi fəallığının əsas hərəkətverici qüvvələrindən birinə çevrilib.
“Bu, qlobal qeyri-müəyyənlik dövründə investisiya tsiklindən imtina etməməli olduğumuza dair mühüm siqnaldır. Əksinə, infrastruktur, energetika, rəqəmsallaşdırma, insan kapitalı və istehsal güclərinə sərmayə qoymağa davam etməliyik”, – Durmişi bildirib.
650 milyondan çox istehlakçıya çıxış
Nazir qeyd edib ki, Şimali Makedoniya Avropa və Avro-Atlantik inteqrasiyanı iqtisadi dayanıqlılığın gücləndirilməsinin mühüm istiqamətlərindən biri hesab edir. Ölkə 2020-ci ildən NATO üzvüdür, eyni zamanda Avropa İttifaqına üzvlüyə namizəddir.
Durmişinin sözlərinə görə, kiçik və açıq iqtisadiyyat üçün sabitlik, proqnozlaşdırılan biznes mühiti və böyük bazarlara çıxış xüsusi əhəmiyyət daşıyır.
O bildirib ki, Aİ ilə Sabitlik və Assosiasiya Sazişi, Türkiyə, Ukrayna və Böyük Britaniya ilə azad ticarət sazişləri, eləcə də regional ticarət mexanizmləri sayəsində Şimali Makedoniya 650 milyondan çox istehlakçının olduğu geniş bazara çıxış əldə edir.
Nazir vurğulayıb ki, bu imkanlar ölkənin investisiya cəlbediciliyinin və iqtisadi inkişaf perspektivlərinin genişləndirilməsinə xidmət edir.
