Bakı, TurkicWorld
Qırğızıstan Prezidenti Sadır Japarov dağ regionlarının davamlılığına və xüsusilə su ehtiyatları ilə bağlı iqlim dəyişikliyinin yaratdığı problemlərin həllinə daha çox diqqət yetirməyə çağırıb.
TurkicWorld xəbər verir ki, o, bu çağırışı Bakıda keçirilən COP29 çərçivəsində çıxışı zamanı edib.
O qeyd edib ki, hər il Mərkəzi Asiyada iqlim dəyişikliyi ilə əlaqədar kritik su ehtiyatları azalır ki, bu da dağlıq rayonların su təchizatı, enerji təchizatı, ərzaq təhlükəsizliyi və ümumi sosial-iqtisadi sabitliyə mənfi təsir göstərir.
Prezident dağ icmalarının üzləşdiyi unikal çağırışları vurğuladı və qeyd etdi ki, bu regionların davamlı inkişafı bütün ərazinin sabitliyi üçün çox vacibdir.
"Bu problemlər sərhədlərlə məhdudlaşmır, bu resurslardan asılı olan hər kəsin həyatına və dolanışığına təsir edir", - deyən Japarov beynəlxalq ictimaiyyəti dağ ekosistemlərini qorumaq üçün tədbirlər görməyə çağırıb.
Qeyd edək ki, dünən BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub. Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunacaq.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
