Bakı. TurkicWorld
2024-cü ilin yanvar-iyul ayında Türkiyədə Birləşmiş Ərəb Əmirlikləri (BƏƏ) kapitalı ilə 69 şirkət qeydiyyata alınıb ki, bu da 2023-cü ilin eyni dövrü ilə müqayisədə 24 şirkət azdır.
Bu barədə TurkicWorld-ə Türkiyə Ticarət və Sənaye Palatasından (TOBB) məlumat verilib.
“Hesabat dövründə Türkiyədə qeydiyyata alınan Birləşmiş Ərəb Əmirlikləri şirkətlərinin məcmu kapitalı 1 milyard 647 milyon 628 min türk lirəsi olduğu halda, 2023-cü ilin eyni dövründə bu rəqəm 619 milyon 519 min türk lirəsi təşkil edib”, – deyə TOBB-dan bildirilib.
Qurumdan o da qeyd olunub ki, 2024-cü ilin yanvar-iyul ayında Birləşmiş Ərəb Əmirlikləri şirkətlərinin əksəriyyəti İstanbulda (62) qeydiyyata alınıb.
“İstanbulda qeydiyyatdan keçən Birləşmiş Ərəb Əmirlikləri şirkətlərinin ümumi kapitalı 1 milyard 640 milyon 828 min türk lirəsi təşkil edib”, – deyə TOBB-dan qeyd edilib.
Məlumata əsasən, 2024-cü ilin yanvar-iyul ayında Türkiyədə Birləşmiş Ərəb Əmirlikləri kapitalı ilə 29 ticarət şirkəti qeydiyyata alınıb. Qalan şirkətlər iqtisadiyyatın digər sahələrini əhatə edir.
