BAKI, TurkicWorld, Orxan Qədirzadə
İordaniya Kralı II Abdulla ölkəsinin regional münaqişələrdə tərəf olmayacağını və İordaniya səmalarının hər hansı bir hərbi qarşıdurma üçün istifadə edilməsinə qətiyyən yol verməyəcəyini bəyan edib.
TurkicWorld xəbər verir ki, o, bu barədə Amman şəhərindəki Əl-Hüseyniyə sarayında jurnalistlərə müsahibəsində bildirib.
Kral vurğulayıb ki, İordaniyanın təhlükəsizliyi və vətəndaşlarının hər şeydən üstündür.
ABŞ və İran arasında artan hərbi ritorika fonunda Kral II Abdulla tərəfləri eskalasiyadan qaçmağa çağırıb. Kral qeyd edib ki, regionu daha böyük münaqişələrdən qorumağın yeganə yolu dialoq və siyasi həllərdir.
"İordaniya öz hava məkanının pozulmasına icazə verməyəcək və heç bir tərəfin müharibə meydanına çevrilməyəcək," – deyə Kral II Abdulla qətiyyətli mövqeyini ifadə edib.
Bu bəyanat ABŞ-ın Tehrana qarşı hərbi əməliyyat ehtimallarını masada saxladığı və Cenevrədə keçirilməsi planlaşdırılan nüvə danışıqları ərəfəsində verilib. Xatırladaq ki, 2025-ci ilin iyun ayında İsrail, ABŞ və İran arasında baş vermiş qısamüddətli hərbi toqquşmalar bölgədəki kövrəkliyi daha da artırıb.
Kral II Abdulla görüş zamanı regional sabitliyin digər mühüm sütunlarına da toxunub.
Kral "İordaniya Fələstin xalqının hüquqlarının qorunması, Qüdsdəki status-kvonun saxlanılması və İordan çayının qərb sahilindəki İsrail məskunlaşma siyasətinin dayandırılması üçün beynəlxalq tərəfdaşlarla işi davam etdirəcək"-deyə bildirib.
Həmçinin o, Suriyada Bəşşar Əsəd rejiminin devrilməsindən (dekabr 2024) sonra yaranmış yeni vəziyyətdə İordaniyanın bu ölkənin ərazi bütövlüyünü və sabitliyini dəstəklədiyini bildirib.
