Bakı. TurkicWorld:
HƏMAS nümayəndə heyəti Misirin dəvətindən sonra 7 aprel tarixində atəşkəs danışıqlarını müzakirə etmək üçün Qahirəyə səfər edəcək.
TurkicWorld AzerVoice-a istinadən xəbər verir ki, bu barədə Əl-Cəzirə kanalı bildirib.
Məlumata əsasən, Qahirədə danışıqların bərpası üçün HƏMAS rəhbəri İsmayıl Haniyə ilə vasitəçilər arasında intensiv danışıqlar olub.
Haniyə vasitəçilərə bildirib ki, danışıqların istənilən raundu daimi atəşkəs əsasında başlamalıdır.
Qeyd edək ki, Qəzzanın Səhiyyə Nazirliyi bildirir ki, Qəzzada 33 mindən çox fələstinli öldürülüb və 2,3 milyon əhalisinin əksəriyyəti evlərini tərk etmək məcburiyyətində qalıb.
Nazirlik öz sayında mülki şəxslər və döyüşçülər arasında fərq qoymur, lakin qadınların və uşaqların ölənlərin üçdə ikisini təşkil etdiyini bildirir.
İsrail dinc sakinlərin ölməsində HƏMAS-ı günahlandırır, çünki yaraqlılar sıx yaşayış məntəqələrində döyüşürlər.
İsrail heç bir sübüt təqdim etmədən 13 min HƏMAS döyüşçüsü öldürdüyünü bildirib.
Bu arada Qəzzada döyüşlər davam edir. İsrailin Qəzzanın cənubunda BMT-nin fələstinli qaçqınlarla işləyən agentliyi olan UNRWA-nın qida paylama məntəqəsinə endirdiyi zərbə nəticəsində agentliyin bir əməkdaşı həlak olub, 22 nəfər yaralanıb.
UNRWA-nın məlumatına görə, son beş ayda gedən döyüşlər zamanı agentliyin həlak olan işçilərinin sayı 165-ə çatdırıb.
Qəzzanın səhiyyə orqanları UNRWA anbarının həyətinə endirilən zərbə nəticəsində ümumilikdə 5 nəfərin öldüyünü bildirib.
