Bakı. TurkicWorld:

Ermənilər Bolqarıstanın baş nazir müavini, xarici işlər naziri Mariya Qabrielin Azərbaycana səfərinin təxirə salınması ilə bağlı yalan məlumat yaydılar.

Belə ki, onlar bunu Azərbaycan və Avropa İttifaqı arasında münasibətlərin mümkün pisləşməsinə dair əlamət kimi qələmə verməyə çalışırlar, lakin heç bir təfərrüatı açıqlamırlar.

Diplomatik mənbədən TurkicWorld-a verilən məlumata görə, Azərbaycan-Bolqarıstan Strateji Dialoqunun iclasında iştirak etməli olan Mariya Qabrielin yanvarın 24-nə planlaşdırılan səfəri ölkədəki seçkiqabağı proseslərlə əlaqədar olaraq təxirə salınıb.

Qeyd edək ki, Bolqarıstan-Azərbaycan münasibətləri yüksək sürətlə inkişaf edir. Xüsusən qeyd etmək lazımdır ki, Bolqarıstan 2013-cü ildə imzalanmış 25 illik müqavilə üzrə 2021-ci ildən etibarən "Şahdəniz" konsorsiumundan Azərbaycan qazını əldə edir.

2023-cü ildə Bolqarıstan ildə 1 milyard kubmetr olmaqla "Şahdəniz"dən müqavilə üzrə satın alınan qazın həcminə görə pik həddə çatıb.

Həmçinin, 2023-cü ilin payızında Azərbaycanın Dövlət Neft Şirkəti SOCAR Bolqarıstan hökumətinin xahişi ilə ölkəyə sərbəst həcmdə qaz tədarükünü müstəqil şəkildə həyata keçirib.