Bakı. TurkicWorld:
Yaponiya Kipr Respublikasından Qəzzaya humanitar yardım çatdırmaq üçün Aralıq dənizi dəniz dəhlizi təşəbbüsünə qoşulacaq.
TurkicWorld AzerVoice-a istinadən xəbər verir ki, bu barədə Yaponiya xarici işlər naziri Yoko Kamikava açıqlayıb.
Məlumata əsasən, hökumət yardımın dəhliz vasitəsilə çatdırılması üçün digər əlaqəli ölkələrlə operativ şəkildə koordinasiya qurmağı planlaşdırır.
Məlumat üçün bildirək ki, layihə, əsasən, Kipr, ABŞ, Aİ və Birləşmiş Ərəb Əmirliklərinin təşəbbüsü ilə başlayıb.
Qeyd edək ki, Qəzzanın səhiyyə rəsmilərinə görə, İsrailin Qəzzanı işğal etməsi 31 mindən çox insanın ölümünə səbəb olub, anklavın çox hissəsini xarabalığa çevirib və Qəzzanın 2,3 milyon əhalisinin 80 faizini köçkün vəziyyətinə salıb.
Qəzzanın Səhiyyə Nazirliyi bildirir ki, Qəzzada 31,270-dən çox fələstinli öldürülüb və 2,3 milyon əhalisinin əksəriyyəti evlərini tərk etmək məcburiyyətində qalıb.
Nazirlik öz sayında mülki şəxslər və döyüşçülər arasında fərq qoymur, lakin qadınların və uşaqların ölənlərin üçdə ikisini təşkil etdiyini bildirir.
İsrail dinc sakinlərin ölməsində HƏMAS-ı günahlandırır, çünki yaraqlılar sıx yaşayış məntəqələrində döyüşürlər.
İsrail heç bir sübüt təqdim etmədən 13 min HƏMAS döyüşçüsü öldürdüyünü bildirib.
Bu arada Qəzzada döyüşlər davam edir. İsrailin çərşənbə günü Qəzzanın cənubunda BMT-nin fələstinli qaçqınlarla işləyən agentliyi olan UNRWA-nın qida paylama məntəqəsinə endirdiyi zərbə nəticəsində agentliyin bir əməkdaşı həlak olub, 22 nəfər yaralanıb.
UNRWA-nın məlumatına görə, son beş ayda gedən döyüşlər zamanı agentliyin həlak olan işçilərinin sayı 165-ə çatdırıb.
Qəzzanın səhiyyə orqanları UNRWA anbarının həyətinə endirilən zərbə nəticəsində ümumilikdə 5 nəfərin öldüyünü bildirib.
