Марказий банк тижорат банкларининг муаммоли кредитлари (NPL) тўғрисида 2022 йил 1 июль ҳолатига маълумотни тақдим этди. Маълум қилинишича, жорий йилнинг июнь ойида тижорат банкларининг кредит қўйилмалари 1,6 триллион сўмга камайган ва 343,6 триллион сўмни ташкил этган.

Кредит қўйилмаларининг қисқариши давлат банклари (Агробанк, Миллийбанк ва Асакабанк) ҳиссасига тўғри келади. Эҳтимолки, кредит қўйилмаларининг қисқариши валюта кредитлари улуши баланд бўлган банкларда сўм курсининг мустаҳкамланиши ҳамда давлат дастурлари бўйича мақсадли молиялаштирилган кредитларнинг сўндирилиши ҳисобига рўй берган бўлиши мумкин.

Марказий банкнинг жисмоний ва юридик шахсларга ажратилган кредитлар қолдиғи тўғрисида кредитлар турлари бўйича маълумотида жисмоний ва юридик шахслар қирқимидан кўриш мумкинки, кредит қўйилмаларининг қисқариши фақат корпоратив кредитлар ҳисобига бўлган. Чакана кредитлар қолдиғи шиддат билан ўсишда давом этмоқда. Хусусан, ой давомида банкларнинг ипотека портфели 1 триллион сўмга, микроқарз портфели 1,1 триллион сўмга кўпайган.

Муаммоли кредитлар (NPL) қолдиғи ва улуши сезиларли тарзда қисқарган. Ой давомида банклар 1,5 триллион сўмлик муаммоли кредитларни ёпишга муваффақ бўлишган. 1 июль ҳолатига расмий кўрсаткичларга кўра, 16,8 триллион сўмлик муаммоли кредитлар бор ва бу жами кредит портфелининг 4,9 фоизини ташкил этади.

Шаҳноза Маматуропова, ЎзА