Bakı. TurkicWorld:

Buğda və qarğıdalı olan üç gəmi, o cümlədən BMT-nin Ümumdünya Ərzaq Proqramı tərəfindən kirayə edilən gəmi Ukrayna limanlarını tərk edib.

TurkicWorld-in məlumatına görə, bu barədə Birgə Koordinasiya Mərkəzindən bildirilib.

"Yanvarın 22-də üç gəmi Ukrayna limanlarını tərk etdi, onlar Qara Dəniz Taxıl Təşəbbüsü çərçivəsində ümumilikdə 105,5 min ton taxıl və digər ərzaq daşıyırlar", - deyə qeyd olunub.

BMT-nin Ümumdünya Ərzaq Proqramı tərəfindən kirayə edilən "Amira Hana" gəmisi Efiopiyaya humanitar yardım üçün 30 min ton buğda daşıyır.

Bundan əlavə, "BC Vanessa" gəmisi (23 050 ton qarğıdalı və 7,3 min ton buğda) İspaniyaya, "Sanita S" quru yük gəmisi (45 150 ton buğda) Türkiyəyə gedir.

Bazar günü dəniz humanitar dəhlizindən keçən gəmi yük üçün Odessa limanına gedir.